ஐபிஎல் : நடப்புச் சாம்பியனாகக் களம் காணும் ஆர்சிபி - ஒரு பார்வை!

ராயல் சேலஞ்சர்ஸ் பெங்களூரு அணி, நீண்ட காலக் காத்திருப்புக்குப் பிறகு 2025 இல் தனது முதல் ஐபிஎல் கிண்ணத்தை வென்று வரலாறு படைத்தது. இதுவரை 271 போட்டிகளில் விளையாடியுள்ள ஆர்சிபி, 132 வெற்றிகளைப் பெற்றுள்ளதுடன் 10 முறை பிளேஆஃப் சுற்றுக்குத் தகுதி பெற்றுள்ளது. 2026 சீசனில் தனது சாம்பியன் பட்டத்தைத் தக்கவைத்துக் கொள்ளும் முனைப்புடன் களமிறங்கும் ஆர்சிபி அணியின் முதுகெலும்பாக விராட் கோலி திகழ்கிறார். இவர் 267 போட்டிகளில் 8,661 ரன்கள் குவித்து ஐபிஎல் வரலாற்றில் அதிக ரன்கள் எடுத்த வீரராக சாதனை படைத்துள்ளார். மேலும், 2016 இல் அவர் ஒரே சீசனில் எடுத்த 973 ரன்கள் இன்றுவரை முறியடிக்க முடியாத சாதனையாக உள்ளது.

அணியின் அதிரடி வீரராக இருந்த கிறிஸ் கெய்ல் 2013 இல் புனே அணிக்கு எதிராக விளாசிய 175* ரன்கள் மற்றும் 17 சிக்ஸர்கள் ஆர்சிபியின் பேட்டிங் வலிமைக்குச் சான்றாகும். பந்துவீச்சில் யுஸ்வேந்திர சாஹல் 139 விக்கெட்டுகளுடன் முதலிடத்தில் இருக்க, ஹர்ஷல் படேல் ஒரு சீசனில் 32 விக்கெட்டுகளை வீழ்த்தி சாதனை படைத்துள்ளார். எம். சின்னசாமி மைதானத்தில் நிலவும் ரசிகர்களின் பெரும் ஆதரவு மற்றும் விராட் கோலி - ஏபி டிவில்லியர்ஸ் ஜோடியின் 229 ரன்கள் பார்ட்னர்ஷிப் போன்ற வரலாற்றுச் சிறப்புகளைக் கொண்ட ஆர்சிபி, சென்னை மற்றும் மும்பை அணிகளுக்கு இணையாகத் தனது ஆதிக்கத்தை நிலைநாட்டத் தயாராகி வருகிறது.