ஹோர்முஸ் நீரிணை தாக்குதல் தொடர்ந்தால் கடும் பதிலடி: ஈரானுக்கு ட்ரம்ப் எச்சரிக்கை

ஹோர்முஸ் நீரிணை பகுதியில் கப்பல்கள் மீது ஈரான் தொடர்ந்து தாக்குதல் நடத்தும் பட்சத்தில், அந்நாட்டின் முக்கிய பாலங்கள், மின் நிலையங்கள் மற்றும் மூலோபாய முக்கியத்துவம் வாய்ந்த கட்டமைப்புகள் மீது அமெரிக்கா தாக்குதல் நடத்தும் என அமெரிக்க ஜனாதிபதி டொனால்ட் ட்ரம்ப் எச்சரிக்கை விடுத்துள்ளார்.

தனது சமூக ஊடக தளமான Truth Social-இல் வெளியிட்டுள்ள பதிவில், தலைநகர் தெஹ்ரானுக்கு அண்மையிலுள்ள முக்கிய இடங்களும் இலக்காகக் கொள்ளப்படலாம் என அவர் குறிப்பிட்டுள்ளார்.

ஈரானின் அணு உலைகள் மீது அமெரிக்கா மேற்கொண்ட தாக்குதல்களுக்கு பதிலடியாக, மத்திய கிழக்கில் உள்ள அமெரிக்க நலன்கள் மற்றும் இராணுவ இலக்குகளை குறிவைத்து ஈரான் ஏவுகணை மற்றும் ட்ரோன் தாக்குதல்களை மேற்கொண்டு வருவதாக தகவல்கள் தெரிவிக்கின்றன.

இந்தச் சூழ்நிலையில், குவைத், பஹ்ரைன் மற்றும் ஜோர்டான் ஆகிய நாடுகள் தங்களது வான்வெளிக்குள் நுழைந்ததாகக் கூறப்படும் ஈரானிய ட்ரோன்களை இடைமறித்து அழித்துள்ளதாக தெரிவிக்கப்பட்டுள்ளது.

அமெரிக்கா மற்றும் ஈரானுக்கு இடையிலான பதற்றம் தொடர்ந்து அதிகரித்து வரும் நிலையில், அதன் தாக்கம் உலக பொருளாதாரத்திலும் எதிரொலித்துள்ளது. குறிப்பாக, சர்வதேச சந்தையில் கச்சா எண்ணெய் விலை குறிப்பிடத்தக்க அளவில் உயர்ந்து, ஒரு பீப்பாய் எண்ணெயின் விலை 94 அமெரிக்க டொலரை எட்டியுள்ளதாக தகவல்கள் தெரிவிக்கின்றன.

மத்திய கிழக்கில் நிலவும் இந்த பதற்றமான சூழ்நிலை, சர்வதேச பாதுகாப்பு மற்றும் உலகளாவிய எரிசக்தி விநியோகத்தில் மேலும் பாதிப்புகளை ஏற்படுத்தக்கூடும் என சர்வதேச அரசியல் ஆய்வாளர்கள் எச்சரித்து வருகின்றனர்.