வயதுக்குட்பட்டவர்களுக்கு சமூக வலைத்தள தடை: நிறுவனங்களுக்கு கடும் எச்சரிக்கை

16 வயதிற்குட்பட்ட சிறுவர்கள் சமூக வலைத்தளங்களைப் பயன்படுத்துவதைத் தடைசெய்யும் சட்டத்தை முறையாக அமல்படுத்தவில்லை என்ற குற்றச்சாட்டின் பேரில், Australia இணைய பாதுகாப்பு ஆணையம் சமூக வலைத்தள நிறுவனங்களுக்கு எதிராக விசாரணையைத் தொடங்கியுள்ளது.

இந்தத் தடை அமலுக்கு வந்தது மூன்று மாதங்கள் கடந்துள்ள நிலையில், பல சிறுவர்கள் இன்னும் விதிகளை மீறி சமூக வலைத்தளக் கணக்குகளை பயன்படுத்தி வருவதாக புகார்கள் எழுந்துள்ளன. இதனால், தொழில்நுட்ப நிறுவனங்கள் சட்டத்தை பின்பற்றுகிறதா என்பதை தீவிரமாக ஆய்வு செய்ய நடவடிக்கை எடுக்கப்பட்டுள்ளது.

Anika Wells தெரிவித்துள்ளார்: “தொழில்நுட்ப நிறுவனங்களுக்கு எதிராக வலுவான ஆதாரங்களை அரசு திரட்டி வருகிறது. இதன் மூலம் நீதிமன்றத்தில் இந்த வழக்கை வெல்ல முடியும்” என்று.

இந்த சட்டத்தை மீறும் நிறுவனங்களுக்கு ஒரு விதிமீறலுக்கே அதிகபட்சமாக 49.5 மில்லியன் அவுஸ்திரேலிய டொலர்கள் வரை அபராதம் விதிக்கப்படும் என எச்சரிக்கப்பட்டுள்ளது.

மேலும், Julie Inman Grant வெளியிட்டுள்ள அறிக்கையில் பல முக்கிய குறைபாடுகள் சுட்டிக்காட்டப்பட்டுள்ளன. குறிப்பாக, வயது சரிபார்ப்பு முறைகள் துல்லியமாக செயல்படாதது, 16 வயதுக்குக் குறைவானவர்கள் பலமுறை சோதனைகளை கடந்து கணக்குகளை உருவாக்க முடிவது, மற்றும் ஏற்கனவே குறைந்த வயதினர் என கண்டறியப்பட்டவர்களிடமும் மீண்டும் சரிபார்ப்பு கோரப்படுவது போன்ற பிரச்சினைகள் குறிப்பிடப்பட்டுள்ளன.

இந்த நடவடிக்கையை உலகின் பல நாடுகள் கவனமாக நோக்கி வருகின்றன. குழந்தைகளை இணையத் துன்புறுத்தல், உடல் உருவக் கேலி போன்ற பிரச்சினைகளிலிருந்து பாதுகாக்க இதே போன்ற சட்டங்களை பல நாடுகள் அறிமுகப்படுத்தத் திட்டமிட்டு வருகின்றன.

மேலும், சமீபத்திய ஆய்வுகளின்படி, பெற்றோர்களில் மூன்றில் ஒரு பகுதி பேர், தடை அமலுக்கு வந்த பின்னரும் தங்கள் பிள்ளைகள் சமூக வலைத்தளங்களை பயன்படுத்தி வருவதாக தெரிவித்துள்ளனர். இது சட்ட அமலாக்கத்தில் இன்னும் சவால்கள் இருப்பதை வெளிப்படுத்துகிறது.