.png){kind=logo}
தமிழீழ விடுதலைப்புலிகள் (LTTE) அமைப்பின் உறுப்பினர் எண்ணிக்கை தொடர்பாக அக்காலத்தில் அரசாங்க புலனாய்வுத்துறையினரால் சமர்ப்பிக்கப்பட்ட அறிக்கைகள் தவறானவை என பீல்ட் மார்ஷல் சரத் பொன்சேகா தெரிவித்துள்ளார்.
வலையொளி ஊடகமொன்றுக்கு வழங்கிய நேர்காணலில் கருத்து வெளியிட்ட அவர், தாம் இராணுவத் தளபதியாகப் பொறுப்பேற்ற காலத்தில் அரசாங்க புலனாய்வுத்துறையில் பணியாற்றிய கபில ஹெந்தவித்தாரன மற்றும் சுரேஷ் சலே ஆகியோர், தமிழீழ விடுதலைப்புலிகள் அமைப்பில் சுமார் 9,000 உறுப்பினர்கள் மட்டுமே உள்ளதாக அறிக்கை சமர்ப்பித்ததாக கூறினார்.
அந்த மதிப்பீட்டை ஏற்க முடியாத சூழலில், தமிழீழ விடுதலைப்புலிகளின் தாக்குதல் முறை, பாதுகாப்பு வியூகங்கள், பங்கர் அமைப்புகள் மற்றும் பல்வேறு முன்னணி நிலைகளில் காணப்பட்ட படை வலிமை ஆகியவற்றை அடிப்படையாகக் கொண்டு தாம் தனிப்பட்ட ஆய்வொன்றை மேற்கொண்டதாக அவர் தெரிவித்தார்.
அந்த ஆய்வின் அடிப்படையில், அமைப்பின் உறுப்பினர் எண்ணிக்கை 30,000-க்கும் அதிகமாக இருக்க வேண்டும் என்ற முடிவுக்கு தாம் வந்ததாகவும், பின்னர் புலனாய்வு ஊடகவியலாளர் இக்பால் அதாஸ் வெளியிட்ட கட்டுரையிலும் சுமார் 35,000 உறுப்பினர்கள் இருப்பதாக குறிப்பிடப்பட்டிருந்தது தனது மதிப்பீட்டை உறுதிப்படுத்தியதாகவும் அவர் கூறினார்.
இதனால், சம்பந்தப்பட்ட அதிகாரிகள் உண்மையான தகவல்களை வழங்கவில்லை என்றும், தவறான புலனாய்வு அறிக்கைகளை சமர்ப்பித்ததாகவும் சரத் பொன்சேகா குற்றஞ்சாட்டினார்.
மேலும், தமிழீழ விடுதலைப்புலிகளின் உண்மையான படை வலிமை மற்றும் செயற்பாடுகள் குறித்து போதுமான புரிதல் இல்லாத காரணத்தினால் கபில ஹெந்தவித்தாரன மற்றும் சுரேஷ் சலே ஆகியோரை அந்தப் பொறுப்புகளில் இருந்து நீக்கியதாகவும் அவர் தெரிவித்தார்.
அதன்பின்னர் முன்னாள் ஜனாதிபதி கோட்டாபய ராஜபக்சவுடன் இணைந்து கொழும்பில் தனித்துவமான உளவுத்துறை நடவடிக்கைகள் முன்னெடுக்கப்பட்டதாகவும், ஈழப் போரின் இறுதிக்கட்ட நடவடிக்கைகளில் சம்பந்தப்பட்ட அதிகாரிகள் குறிப்பிடத்தக்க பங்களிப்பை வழங்கவில்லை என்றும் சரத் பொன்சேகா தனது நேர்காணலில் தெரிவித்துள்ளார்.
இந்தக் கருத்துகள் சரத் பொன்சேகா வெளியிட்ட குற்றச்சாட்டுகளாகும். அவை தொடர்பாக குற்றம் சாட்டப்பட்ட தரப்பினரின் பதில் அல்லது அதிகாரப்பூர்வ விளக்கம் இந்தச் செய்தி வெளியாகும் வரை வெளிவரவில்லை.
கருத்துகள்
கருத்தைப் பதிவிடுக