திருமணத்திற்கு முன் அதிர்ச்சி: தொழிலதிபரின் மகனை அடி பள்ளத்தில் தள்ளி கொன்ற வருங்கால மனைவி கைது

மகாராஷ்டிர மாநிலத்தில் பெரும் பரபரப்பை ஏற்படுத்தியுள்ள சம்பவமொன்றில், பிரபல ரியல் எஸ்டேட் தொழிலதிபரின் மகன் மர்மமான முறையில் உயிரிழந்த வழக்கில் அவரது வருங்கால மனைவியும், அவரது காதலனும் கைது செய்யப்பட்டுள்ளனர். ஆரம்பத்தில் விபத்து என கருதப்பட்ட இந்த மரணம், பின்னர் திட்டமிட்ட கொலை என விசாரணைகளில் வெளிச்சத்துக்கு வந்துள்ளது.

தொழிலதிபரின் மகனுக்கும் இளம்பெண்ணுக்கும் விரைவில் திருமணம் நடைபெற இருந்ததாக தெரிவிக்கப்படுகிறது. திருமண ஏற்பாடுகள் மிகப் பிரம்மாண்டமாக செய்யப்பட்டிருந்தன. ராஜஸ்தானில் உள்ள புகழ்பெற்ற அரண்மனை ஒன்றை சுமார் 17 கோடி ரூபாய் செலவில் முன்பதிவு செய்திருந்ததோடு, விருந்தினர்களின் போக்குவரத்திற்காக இரண்டு சொகுசு விமானங்களும் ஏற்பாடு செய்யப்பட்டிருந்தன.

திருமணத்திற்கு முன்பாக நடத்தப்படவிருந்த புகைப்படப் படப்பிடிப்புக்காக (Pre-Wedding Photo Shoot) இருவரும் புனேயில் உள்ள வரலாற்றுச் சிறப்புமிக்க லோகட் கோட்டைப் பகுதிக்கு சென்றுள்ளனர். சம்பவத்திற்கு முந்தைய நாள், இருவரும் தனியாக அங்கு சென்றிருந்ததாக விசாரணைகளில் தெரியவந்துள்ளது.

அதன் பின்னர், தொழிலதிபரின் மகன் 350 அடி ஆழமுள்ள பள்ளத்தில் தவறி விழுந்து உயிரிழந்ததாக தகவல் வெளியிடப்பட்டது. ஆனால், சம்பவ இடத்தின் சூழ்நிலைகள் மற்றும் இளம்பெண்ணின் வாக்குமூலங்களில் காணப்பட்ட முரண்பாடுகள் பொலிஸாருக்கு சந்தேகத்தை ஏற்படுத்தின.

இதனைத் தொடர்ந்து, இளம்பெண்ணின் கைப்பேசி தகவல்கள், சமூக வலைத்தள தொடர்புகள், அழைப்பு பதிவுகள் மற்றும் பிற டிஜிட்டல் ஆதாரங்கள் விரிவாக ஆய்வு செய்யப்பட்டன. விசாரணையின் போது, இளம்பெண் தனது காதலனுடன் இணைந்து திருமணத்தைத் தவிர்க்கவும், எதிர்கால வாழ்க்கையை வேறு ஒருவருடன் அமைத்துக்கொள்ளவும் திட்டமிட்டு இந்தக் கொலையை அரங்கேற்றியதாக பொலிஸார் சந்தேகிக்கின்றனர்.

திட்டமிட்ட முறையில் தொழிலதிபரின் மகனை பள்ளத்தில் தள்ளிவிட்டு, அதை விபத்தாக சித்தரிக்க முயற்சி செய்தது ஆதாரங்களின் மூலம் உறுதியானதைத் தொடர்ந்து, இளம்பெண்ணும் அவரது காதலனும் கைது செய்யப்பட்டுள்ளனர்.

இந்தச் சம்பவத்தில் வேறு நபர்கள் அல்லது குடும்ப உறுப்பினர்களுக்கு தொடர்பு உள்ளதா என்பது குறித்தும் பொலிஸார் தொடர்ந்து விசாரணை நடத்தி வருகின்றனர். இந்தியாவில் அண்மைக் காலங்களில் பெரும் அதிர்வலை ஏற்படுத்திய காதல், பணம் மற்றும் துரோகம் கலந்த குற்றச்சம்பவங்களில் இதுவும் ஒன்றாக பார்க்கப்படுகிறது.