இலங்கை காதலனிடம் ஏமாந்த ஜெர்மனி பெண் ; , யூரோக்களுக்காக நடந்த கொடூரத் தாக்குதல்

காதல் உறவின் அடிப்படையில் மீன்பிடிப் படகு வாங்குவதற்காக வழங்கிய 25,000 யூரோக்களைத் திருப்பிக் கேட்டபோது, குறித்த பெண் தாக்கப்பட்டதாகக் கூறப்படும் சம்பவம் தொடர்பில் பொலிஸார் விசாரணைகளை முன்னெடுத்து வருகின்றனர்.

கிடைக்கப்பெற்ற தகவல்களின்படி, காலி, பூசா, பிட்டிவெல்ல பகுதியைச் சேர்ந்த 29 வயதுடைய இளைஞருக்கும் ஜெர்மனியைச் சேர்ந்த 40 வயதுடைய பெண்ணுக்கும் இடையில் காதல் உறவு ஏற்பட்டுள்ளது.

இதன் அடிப்படையில், தனது காதலனின் வாழ்வாதாரத்திற்காக மீன்பிடிப் படகு ஒன்றைக் கொள்வனவு செய்வதற்கு அந்தப் பெண் 25,000 யூரோக்களை வழங்கியதாகக் கூறப்படுகிறது.

குறித்த பெண் மீண்டும் இலங்கைக்கு வருகை தந்தபோது, பூசா பகுதியில் உள்ள ஹோட்டல் ஒன்றில் அறையை முன்பதிவு செய்து தங்கியிருந்ததாகத் தெரிவிக்கப்படுகிறது.

இதன்போது, பணம் தொடர்பாக இருவருக்கும் இடையில் முரண்பாடு ஏற்பட்டதாகவும், முன்னர் வழங்கிய பணத்தைத் திருப்பித் தருமாறு பெண் கோரியபோது, இளைஞர் அவரைத் தாக்கியதாகவும் முறைப்பாட்டில் குறிப்பிடப்பட்டுள்ளதாகக் கூறப்படுகிறது.

மேலும், பெண் உதவி கோருவதற்குப் பயன்படுத்த முயன்ற கைப்பேசியும் சேதப்படுத்தப்பட்டதாகத் தெரிவிக்கப்படுகிறது.

சம்பவத்தைத் தொடர்ந்து பாதிக்கப்பட்ட பெண் ரத்கம பொலிஸ் நிலையத்தில் முறைப்பாடு செய்துள்ளதாகக் கூறப்படுகிறது.

தான் வழங்கிய பணத்தை மீட்டுத் தருவதுடன், தனக்கு நீதி வழங்கப்பட வேண்டும் என்றும் அவர் கோரிக்கை விடுத்துள்ளதாகத் தெரிவிக்கப்படுகிறது.

குறித்த முறைப்பாட்டின் அடிப்படையில், 29 வயதுடைய இலங்கை இளைஞரைக் கைது செய்வதற்காகப் பொலிஸார் விசாரணைகளை முன்னெடுத்து வருவதாகத் தகவல்கள் தெரிவிக்கின்றன.