லம்போர்கினி கார்கள் குற்றச்சாட்டு: ஒன்றையாவது கண்டுபிடித்து தருமாறு அரசாங்கத்திடம் நமல் ராஜபக்ச சவால்

தன்னிடம் 18 லம்போர்கினி கார்கள் இருப்பதாக முன்வைக்கப்பட்ட குற்றச்சாட்டுகள் தொடர்பாக, குறைந்தபட்சம் ஒரு வாகனத்தையாவது கண்டுபிடித்து தமக்கு வழங்குமாறு நாடாளுமன்ற உறுப்பினர் நமல் ராஜபக்ச அரசாங்கத்திடம் கோரிக்கை விடுத்துள்ளார்.

கடந்த தேர்தல் காலத்தில் அரசியல் மேடைகள் மற்றும் சமூக ஊடகங்களில், நமல் ராஜபக்சவிடம் பல அதிநவீன லம்போர்கினி கார்கள் இருப்பதாக குற்றச்சாட்டுகள் முன்வைக்கப்பட்டிருந்தன. அந்த குற்றச்சாட்டுகளுக்கு பதிலளிக்கும் வகையில் அவர் இந்த கருத்தை வெளியிட்டுள்ளார்.

இதுகுறித்து கருத்து தெரிவித்த அவர், தன்னிடம் இருப்பதாக கூறப்பட்ட 18 லம்போர்கினி வாகனங்களில் குறைந்தபட்சம் ஒன்றையாவது கண்டுபிடித்து வழங்கினால் அதனை ஓட்டுவதற்கு தயாராக இருப்பதாக தெரிவித்துள்ளார்.

மேலும், தாம் வாழ்நாளில் ஒருபோதும் லம்போர்கினி வாகனத்தை ஓட்டியதில்லை என்றும், அரசாங்கம் அந்த வாகனங்களில் ஒன்றை கண்டுபிடித்து வழங்கினால், அதில் தம்மை குற்றம்சாட்டியவர்களையும் அழைத்துச் செல்வதாக நகைச்சுவையாக குறிப்பிட்டுள்ளார்.

தன்னிடம் இருப்பதாக கூறப்பட்ட வாகனங்களின் இருப்பிடத்தை இதுவரை யாராலும் நிரூபிக்க முடியவில்லை என சுட்டிக்காட்டிய அவர், இந்த குற்றச்சாட்டை முன்வைத்த தரப்பினர் அவற்றின் இருப்பை வெளிப்படுத்தினால் அதனை மகிழ்ச்சியுடன் ஏற்றுக்கொள்வதாகவும் தெரிவித்துள்ளார்.

இந்த கருத்து அரசியல் வட்டாரங்களிலும் சமூக ஊடகங்களிலும் மீண்டும் விவாதத்தை ஏற்படுத்தியுள்ளதுடன், கடந்த காலத்தில் முன்வைக்கப்பட்ட குற்றச்சாட்டுகள் தொடர்பான கவனத்தையும் புதுப்பித்துள்ளது.