கருக்கலைப்புக்கு மறுத்த கர்ப்பிணி உயிரிழப்பு: கணவர் மற்றும் மாமியார் மீது வழக்கு

இந்தியாவின் மகாராஷ்டிரா மாநிலத்தில் கர்ப்பிணி பெண் ஒருவர் கணவர் மற்றும் மாமியார் தாக்கியதாகக் கூறப்படும் சம்பவத்தில் உயிரிழந்துள்ளமை பெரும் அதிர்ச்சியை ஏற்படுத்தியுள்ளது. இந்த சம்பவம் தொடர்பாக உயிரிழந்த பெண்ணின் கணவரும் அவரது தாயாரும் பொலிஸ் விசாரணைக்கு உட்படுத்தப்பட்டுள்ளனர்.

தானே மாவட்டத்தின் முப்ரா பகுதியைச் சேர்ந்த இளம் பெண் ஒருவர் திருமணமாகி கணவர் வீட்டில் வசித்து வந்த நிலையில் கர்ப்பமாக இருந்ததாக தெரிவிக்கப்படுகிறது. குடும்பத்தில் ஏற்பட்ட பல்வேறு கருத்து வேறுபாடுகள் காரணமாக கணவன்–மனைவி இடையே அடிக்கடி தகராறு ஏற்பட்டுள்ளதாக விசாரணைகளில் தெரியவந்துள்ளது.

குறிப்பாக அடமானம் வைக்கப்பட்டிருந்த நகைகளை மீட்பது தொடர்பான பிரச்சினையும், கர்ப்பத்தை தொடர வேண்டாம் என்ற கணவரின் வற்புறுத்தலும் குடும்பத்தில் பதற்றத்தை அதிகரித்ததாக கூறப்படுகிறது. கருவை கலைக்குமாறு தொடர்ந்து வற்புறுத்தப்பட்டதாகவும், அதற்கு மாமியாரும் ஆதரவாக இருந்ததாகவும் தகவல்கள் தெரிவிக்கின்றன.

சம்பவம் இடம்பெற்ற நாளில் ஏற்பட்ட கடும் வாக்குவாதத்தின் போது, கணவரும் அவரது தாயாரும் இணைந்து கர்ப்பிணி பெண்ணை தாக்கியதாக குற்றச்சாட்டு எழுந்துள்ளது. தாக்குதலால் பலத்த காயமடைந்த பெண் உடனடியாக மருத்துவமனைக்கு கொண்டு செல்லப்பட்டு தீவிர சிகிச்சை அளிக்கப்பட்டபோதிலும், சிகிச்சை பலனின்றி உயிரிழந்தார்.

உயிரிழந்த பெண்ணின் பெற்றோர் அளித்த முறைப்பாட்டின் அடிப்படையில் பொலிஸார் வழக்குப் பதிவு செய்து விசாரணைகளை ஆரம்பித்துள்ளனர். சம்பவத்தின் உண்மை நிலை, குடும்ப வன்முறை குற்றச்சாட்டுகள் மற்றும் மரணத்திற்கான காரணங்கள் குறித்து மேலதிக விசாரணைகள் தொடர்ந்து நடைபெற்று வருகின்றன.

இந்த சம்பவம் பெண்களுக்கு எதிரான குடும்ப வன்முறை மற்றும் கர்ப்பிணிகளின் பாதுகாப்பு குறித்து மீண்டும் கவலைகளை எழுப்பியுள்ளது.