காரசாரமான சுவையில் தெலங்கானா ஸ்டைல் சிக்கன் மசாலா: வீட்டிலேயே எளிதாக செய்வது எப்படி?

சிக்கன் உணவுகளை விரும்பாதவர்கள் மிகவும் குறைவு. வழக்கமாக செய்யப்படும் சிக்கன் கிரேவி மற்றும் வறுவல்களுக்கு மாற்றாக, தெலங்கானா மாநிலத்தின் பாரம்பரிய சுவையில் தயாரிக்கப்படும் சிக்கன் மசாலா தனித்துவமான காரமும் நறுமணமும் நிறைந்த ஒரு சிறந்த உணவாகும்.

வறுத்து அரைக்கப்படும் மசாலா பொருட்களும், தேங்காய் விழுதும் சேர்ந்து இந்த உணவிற்கு தனித்துவமான சுவையை வழங்குகின்றன. சாதம், இட்லி, தோசை, சப்பாத்தி, நான் மற்றும் புரோட்டா உள்ளிட்ட பல்வேறு உணவுகளுடன் பரிமாற ஏற்ற இந்த தெலங்கானா ஸ்டைல் சிக்கன் மசாலாவை வீட்டிலேயே எளிதாக தயாரிக்கலாம்.

தேவையான பொருட்கள்:

சிக்கன் – 1 கிலோ

எண்ணெய் – 2 தேக்கரண்டி

வெங்காயம் – ¼ கிலோ (பொடியாக நறுக்கியது)

இஞ்சி – 2 இன்ச் துண்டு (நறுக்கியது)

பூண்டு – 10 பற்கள் (நறுக்கியது)

கறிவேப்பிலை – 1 கொத்து

மஞ்சள் தூள் – ½ தேக்கரண்டி

காஷ்மீரி மிளகாய்த்தூள் – ½ தேக்கரண்டி

உப்பு – தேவையான அளவு

தண்ணீர் – தேவையான அளவு

எலுமிச்சைச் சாறு – ½ தேக்கரண்டி

துருவிய தேங்காய் – 1 கப்

கொத்தமல்லித்தழை – தேவையான அளவு

மசாலா அரைக்க:

வரமிளகாய் – 7

மல்லி விதை – 2 தேக்கரண்டி

சீரகம் – 1 தேக்கரண்டி

மிளகு – 1 தேக்கரண்டி

கசகசா – 1 தேக்கரண்டி

செய்முறை:

முதலில் ஒரு கடாயை சூடாக்கி வரமிளகாய், மல்லி விதை, சீரகம் மற்றும் மிளகை நறுமணம் வரும் வரை வறுக்க வேண்டும். பின்னர் கசகசாவை சேர்த்து மேலும் சில நிமிடங்கள் வறுத்து ஆறவிடவும்.

ஆறிய பின்னர் இவற்றை மிக்சியில் போட்டு நைசாக அரைத்து தனியாக வைத்துக்கொள்ளவும். அதே கடாயில் துருவிய தேங்காயை பொன்னிறமாக வறுத்து, சிறிதளவு தண்ணீர் சேர்த்து மென்மையான விழுதாக அரைக்க வேண்டும்.

இஞ்சி மற்றும் பூண்டையும் சேர்த்து தனியாக விழுதாக அரைத்து வைத்துக்கொள்ளவும்.

பின்னர் ஒரு பாத்திரத்தில் எண்ணெய் ஊற்றி சூடானதும் வெங்காயத்தை சேர்த்து பொன்னிறமாகும் வரை வதக்கவும். அதனுடன் இஞ்சி-பூண்டு விழுதை சேர்த்து பச்சை வாசனை நீங்கும் வரை கிளற வேண்டும்.

அதன்பின் கறிவேப்பிலை மற்றும் தேங்காய் விழுதை சேர்த்து நன்றாக கலக்கி, சிறிதளவு தண்ணீர் ஊற்றி சில நிமிடங்கள் கொதிக்கவிடவும்.

பின்னர் சுத்தம் செய்யப்பட்ட சிக்கன், மஞ்சள் தூள், காஷ்மீரி மிளகாய்த்தூள், அரைத்து வைத்துள்ள மசாலா பொடி மற்றும் தேவையான உப்பு சேர்த்து நன்றாக கிளறவும். சிக்கன் மசாலாவுடன் நன்கு கலந்ததும் தேவையான அளவு தண்ணீர் ஊற்றி மூடி வைத்து மிதமான தீயில் சுமார் 20 நிமிடங்கள் வேகவிட வேண்டும்.

இறுதியாக எலுமிச்சைச் சாறு, கொத்தமல்லித்தழை மற்றும் சிறிதளவு கறிவேப்பிலை சேர்த்து கிளறினால் நறுமணமும் காரசாரமான சுவையும் நிறைந்த தெலங்கானா ஸ்டைல் சிக்கன் மசாலா பரிமாறத் தயாராகிவிடும்.