எரிபொருள் நிலையத்தில் பரபரப்பு; குறியீடு விவகாரத்தில் ஊழியர் மீது தாக்குதல்

மிரிஹான பகுதியில் உள்ள எரிபொருள் நிரப்பு நிலையத்தில் பணியாற்றிய ஊழியர் ஒருவரை தாக்கிய சம்பவம் சமூக வலைத்தளங்களில் வைரலானதைத் தொடர்ந்து, சம்பவத்துடன் தொடர்புடைய 34 வயது நபர் பொலிஸாரால் கைது செய்யப்பட்டுள்ளார். ஆரம்ப விசாரணைகளின் படி, குறித்த நபர் QR குறியீடு இன்றி எரிபொருள் பெற முயன்றதாகவும், ஊழியர் அதை மறுத்ததைத் தொடர்ந்து வாய்த்தகராறு தாக்குதலாக மாறியுள்ளதாக தெரியவந்துள்ளது.

சம்பவத்தின் காணொளி பரவியதால் பொதுமக்கள் மத்தியில் பெரும் எதிர்ப்பும் விவாதமும் ஏற்பட்ட நிலையில், மிரிஹான பொலிஸார் விரைவாக விசாரணை ஆரம்பித்தனர். கைது செய்யப்பட்ட சந்தேகநபருக்கு கடுமையான எச்சரிக்கை வழங்கப்பட்டதுடன், பாதிக்கப்பட்ட ஊழியரின் வேண்டுகோளின் பேரில் இருதரப்புக்கும் இடையே சமரசம் ஏற்படுத்தப்பட்டதாக தெரிவிக்கப்பட்டுள்ளது.

இந்த சம்பவம், பொதுச் சேவை நிலையங்களில் பணிபுரியும் ஊழியர்களின் பாதுகாப்பு மற்றும் சேவை நடைமுறைகளைப் பின்பற்ற வேண்டிய அவசியம் குறித்து மீண்டும் கவனம் ஈர்த்துள்ளது.